Самарқанднинг «Динамо» клуби янги мавсумга тайёргарликни Тошкентда олиб бормоқда. Аҳмад Убайдуллаев шогирдлари Тошкент йиғини доирасида навбатдаги ўртоқлик учрашувини ўтказишди.

Қозоғистон Биринчи Лигасининг 2011 йилги мавсумида 17 жамоа орасида 15-ўринни эгаллаган «Қизилжар» клуби 22 февраль куни самарқандликларга рақиб бўлди. «Динамо» расмий сайти хабарига кўра, учрашувнинг биринчи бўлимида ташаббус Убайдуллаев шогирдларида бўлган. Бунинг самараси ўлароқ «Динамо» ҳужумчиси Зафар Полвонов 24-дақиқада ҳисобни очди.

Қозоғистонликлар иккинчи бўлимда ҳисобни тенглаштиришга муваффақ бўлишди. Станислав Богдановнинг 50-дақиқада пенальтидан самарқандликлар дарвозасига урган голи ўйинда сўнггиси бўлиб қолди. 1:1 ҳисоби ўйин якунига қадар ўзгармади. Қайд этиш жоиз, иккинчи бўлимда «Динамо» сафида Леонид Кошелев ҳаракат қилган.

«Динамо» Тошкентдаги сўнгги йиғинни 14 февраль куни бошлаган бўлиб, ўтган вақт мобайнида жамоа Зарафшоннинг «Қизилқум» (0:1) ва Қозоғистоннинг «Спартак» (1:0) жамоаларига қарши майдонга тушган эди.

Ўртоқлик учрашуви
22 февраль, чоршанба
«ДИНАМО» - «ҚИЗИЛЖАР» (ҚОЗОҒИСТОН) 1:1 (1:0)
Голлар: Зафар Полвонов (24) – Станислав Богданов (50-пен.).

«Динамо»: Андрей Мельничук, Аҳрол Рисқуллаев, Дэвид Ония, Жамол Отақулов, Мурод Ҳамроев, Дилявер Абибуллаев, Суннатилла Мамадалиев, Жасур Бобоев, Баҳодир Муртазоев, Зафар Полвонов, Рўзим Ахмедов.

Захирадан майдонга тушганлар: Игорь Михайлов, Андрей Ерохин, Никита Свиридов, Искандар Холмирзаев, Леонид Кошелов, Сирожиддин Сайфиев.