Тошкентдаги "НБУ-Осиё" клубига тегишли бўлган ўйингоҳда машғулотларни давом эттираётган Наманганнинг "Навбаҳор" клуби таркибига яна уч нафар янги футболчилар келиб қўшилди. Бу ҳақда клуб мухлислар сайти хабар тарқатмоқда.

«Бугунги машғулотларда уч нафар янги футболчи иштирок этди. Хусусан, Туркманистоннинг "университетчилар" жамоаси МТТУ да тўп сурган ҳимоячи Максим Белих, мавсум бошида "Пахтакор" йиғинларида иштирок этган ва шартнома тузган Алишер Маҳмудов ҳамда ўтган мавсумни "Оқтепа"да ўтказган Руфат Исроиловлар бугунги машғулотларда қатнашишди», деб ёзилади сайтда.

Бир неча кун аввал "Навбаҳор" "Оқтепа"га 0:2 ҳисобида мағлуб бўлганди. Ушбу баҳсда Руфат Исроилов "Оқтепа" таркибида наманганликлар дарвозасига гол киритган эди. Айнан ўша учрашувдаги ҳаракатлари туфайли мураббийлар Исроиловни жамоага таклиф этишган бўлса керак. Айтиш керакки, Руфат Исроилов фаолияти давомида "Андижон", "Динамо", "Шўртан", "Машъал", "Қизилқум" сингари бир қатор жамоаларда тўп сурган.

Ҳозирча навбатдаги ўртоқлик учрашувлари ҳақида маълумотлар йўқ. Эслатиб ўтамиз, Тошкент йиғини феврал ойинининг сўнгги кунида якунланади. Бир кунлик таътилдан сўнг эса ҳал қилувчи йиғин жамоа қароргоҳида олиб борилади.