17-23 февраль кунлари Дилшод Нуралиев бошқарувидаги Ўзбекистон ўсмирлар терма жамоаси Тошкентда йиғин ўтказди.

Хабарингиз бор, 1996 йилда туғилган футболчилардан иборат термамиз шу йилнинг 21 сентябрь 6 октябрь кунлари Эронда бўлиб ўтадиган Осиё чемпионатида қатнашади.

Пойтахтда ташкил этилган йилнинг дастлабки йиғини доирасида ўсмирларимиз учта ўртоқлик учрашувида майдонга тушишди. Дастлаб 19 февраль куни термамиз аъзолари «Локомотив» ўринбосарларига қарши баҳс олиб бориб, 2:0 ҳисобида ғалаба қозонишди. Ўйиндаги ҳар иккала гол «Машъал» тарбияланувчиси Шохжаҳон Аббосов номига ёзилди. 21 февраль кунги иккинчи назорат баҳси «Металлург» ўринбосарлари билан кечди ва бу ўйинда Нуралиев шогирдлари 1:0 ҳисобида зафар қучишди.

Ягона гол муаллифи «Пахтакор» ўйинчиси Одилов Муҳиддин бўлди. Ва ниҳоят учинчи ўртоқлик ўйини 23 февралда ўтказилди. Биринчи лига иштирокчиси «НБУ-Осиё»га қарши учрашувда ўсмирлар термамиз 0:3 ҳисобида имкониятни бой бериб қўйди. Шуни айтиш лозим, барча ўйинлар Чиғатойдаги сунъий майдонда ўтказилди.