«Милан» ва «Наполи» собиқ бош мураббийи Женнаро Гаттузо Стив Брюс ўрнига «Ньюкасл» бош мураббийи бўлиши мумкин, деб хабар беради Calcio Mercato.
Манбага кўра, инглизлар раҳбарияти ҳозирги мураббийдан норози ва аллақачон унга ўринбосар излай бошлаган.
Маълум бўлишича, айнан Гаттузо бу лавозимга асосий даъвогар сифатида кўринмоқда. Ёзда италиялик мутахассис «Тоттенхем»ни бошқаришга яқин эди, лекин томонлар бу борада ўзаро келиша олишмади.
Эслатиб ўтамиз, Гаттузонинг охирги иш жойи «Фиорентина» эди. Унинг қўл остида жамоа бирорта ҳам расмий ўйин ўтказмаган.
