Осиё футбол конфедерацияси талаби асосида Суперлига клублари лицензиялаш жараёнидан ўтиши сизга маълум. Бунда халқаро майдонда ўйнаш имконияти кам бўлган клублар илгари лицензиялаш масаласига жиддий эътибор қаратмаган.
ЎзПФЛ раҳбариятида ўзгариш юзага келгач, янги таркиб илк ишни айнан шу жараёнга эътибор қаратишдан бошлади. Ва биз эндиликда нафақат Суперлига, балки Про лига клубларини ҳам лицензиялашдан ўтказишга эришдик. Яъни, бугунга келиб Суперлига ва Про лига клубларига қўйиладиган талаблар ўртасидаги катта тофовут босқичма-босқич қисқартирилмоқда. Бу келажакда Про лига орқали Суперлига йўлланмасини қўлга киритган клублар талаблар борасида катта муаммолар қаршисидан чиқишининг олдини олади.
Қувонарли жиҳати шундаки, жорий йил ҳисобидан ОФК лицензиясини олиш учун нафақат Coca-Cola Суперлига жамоалари, балки бир нечта Про лига клублари ҳам жиддий даъвогар бўлиб турибди. Содда қилиб тушунтирганда, ЎзПФЛ сўнгги бир йил давомида нафақат клубларга талаб қўйди, балки уларнинг ижроси масаласида клублар билан ҳамкорлик қилди. Бунинг натижасида Ўзбекистон тарихида илк бор қуйи лига клублари ҳам ОФК томонидан қўйилган минимал талабларга жавоб бериш арафасида турибди.
ОФК, шунингдек, бу йилдан эътиборан аёллар жамоаларини ривожлантириш масаласига аҳамият бермоқда. Хусусан аёллар жамоалари синов тариқасида илк бор лицензиялаш жараёнидан ўтказилди ва Ўзбекистон кам сонли аъзо мамлакатлар қаторида аёллар клубларини ҳам лицензиялашга жалб этди. 2022 йилдан эътиборан бу жараён барча аъзо мамлакатлар учун мажбурий бўлади. 2023 йилдан бошлаб эса аёллар жамоалари иштирокида тўлақонли Осиё Чемпионлар лигаси ташкил этиш режага киритилган. Олдинга ўтиб шуни айтиш керакки, жорий мавсум ҳисобидан камида 2 та аёллар жамоамиз ОФК лицензиясини қўлга киритиши мумкин. Бу эса қитъа миқёсида Ўзбекистон имиджига ижобий таъсир кўрсатади.
