Бир қараганда, оддий Миллатлар кубоги финали, лекин ўйиндаги кучлар мувозанатини назарга олсак, анча қизиқ тўқнашув.

Сабаби. Футболда азалдан икки мактаб бор. Юлдузларга мослаштирилган тактика ёки тактикага хизмат қиладиган ижрочилар... Мураббийлар ва жамоалар ҳам мана шу икки йўналишга бўлинади. Бир тарафда Кройф, Гвардиола, Тухел, Клопп, иккинчи томонда Фергюсон, Анчелотти, Зидан, Сульшер... Бир томонда "Реал", "МЮ", "ПСЖ", иккинчи томонда "Сити", "Челси", "Бавария".

Биласизми, худди клублар футболи сингари, миллий жамоаларда ҳам ўйин қуришга систематик мураббийлар пайдо бўлди ва мана шундай мураббийлик жамоалари ичидаги энг ёрқин ва балки кучли намуна — Испания.

Франция эса, тескари ғояни тарғиб қилади, бошқача бўлиши мумкинмас, зеро айни пайтда дунёда энг юлдузли жамоа айнан Дешамда. Бензема, Мбаппе, Погба, Гризманн, табиийки, уларни бир тизимга мослаш мумкинмас, табиийки ҳар қандай мураббий ўйинини ушбу юлдузларнинг устунлик ва камчиликлари асосига қуради.

Қизиғи, испанлар ярим финалда худди ўзига ўхшаган систематик жамоа бўлмиш Италияни, французлар эса, бошқа бир юлдузли таркиб — Бельгияни енгишди. Яъни ҳар қандай ҳолатда ҳам биз мана шу азалий савол, система ва ижрочилар ўртасидаги масалани гувоҳи бўлардик.

Бир ўйин, албатта, якуний хулосани бермайди, аммо навбатдаги тўқнашувни кузатиш, икки ғоя ўртасидаги фарқ ва бу сафар ҳам, қандай қилиб система юлдузларни сояда қолдира олиши ёки аксинча, ижрочилар системани парчалаши мумкинлигини кузатиш мароқли.

Сиз қайси томондасиз?

Қаҳрамон АСЛАНОВ.