Жиззах вилояти мезбонлик қилган 40 ёшдан катта бўлган футболчилар ўртасидаги Ўзбекистон кубогининг ҳал қилувчи ўйинлари бўлиб ўтди.

Дастлабки баҳс «Тошкент» ҳамда «Навоий» жамоалари ўрсатида 3-ўрин учун кечди. Тенгма тенг курашлар остида кечган учрашувнинг асосий бўлимларида ғолиб номи аниқланмади. Шундан кейин пенальтилар сериясига мурожаат қилинди. Унга кўра, омад «Тошкент» жамоасига кулиб боқди, 5-4.

Финал учрашувида эса «Жиззах» ва «Қўқон» жамоалари куч синашишди. Мазкур баҳсда мезбонлар Улуғбек Бақоевнинг киритган голи эвазига ғалабани қўлга киритиб, турнир чемпионига айландилар.

Финал учрашувидан сўнг тақдирлаш маросими бўлиб ўтди. Унда ЎФА биринчи вице-президентининг маслаҳатчиси Раҳмиддин Зикриёев, ЎФА фахрийлар кенгаши раиси Тўлаган Исоқов, ЎФА ҳудудий футбол ассоциациялари билан ишлаш бўлими бошлиғи Бахтиёр Ширинов, «Сўғдиёна» клуби президенти Ўктам Маҳмуджонов, шунингдек, кенг жамоатчилик вакиллари иштирок этишди.

Мусобақанинг ғолиб ва совриндорларга эсдалик совғалари топширилди.