Собиқ бразилиялик машҳур ҳимоячи ва ҳозирда 2022 йил Қатарда бўлиб ўтадиган Жаҳон чемпионати элчиси бўлган Кафу ФИФАнинг ҳар икки йилда бир марта жаҳон чемпионатини ўтказиш ғоясига қарши чиқди.
“Мен бунга мутлақо қаршиман. Турнир бу билан ўзининг жозибасини йўқотади. Мусобақани тўрт йил кутиш барча учун ўзгача кайфият беради. Шунингдек, мусобақа кубоги ўз қадрини йўқотади ва чемпионлар сони жуда кўп бўлади. Бу тўғри эмас. Мен бу фикрни қўллаб-қувватламайман”, - деди Кафу Қатарда журналистлар билан учрашувда.
Эслатиб ўтамиз, октябрь ойининг ўрталарида ФИФА миллий терма жамоа федерацияларига ҳар икки йилда бир марта жаҳон чемпионатини ўтказиш нияти борлиги ҳақида хабар юборган эди. Ўзгартириш 2026 йилги жаҳон чемпионатидан кейин кучга кириши режалаштирилган.
