Чемпионлар Лигаси гуруҳ босқич 4-туридан ўрин олган «Аталанта» ҳамда "Манчестер Юнайтед" жамоалари ўртасидаги учрашув 2:2 ҳисоби билан якунланди.

МЮ ҳужумчиси Криштиану Роналду ўйинда дублга эришди ва ҳар иккала голини бўлимларга қўшим берилган дақиқаларда киритди (45+1, 90+2).

Португалиялик "Манчестер Юнайтед" сафида барча мусобақаларда 303-ўйинида майдонга тушиб голлари сонини 127тага етказиб олди. Таққослаш учун, манкунианликлар устози Оле Гуннар Сулшер эса футболчилик фаолияти давомида МЮдаги 126 голни 366 баҳсда киритган эди.

Роналду шунингдек, МЮ сафида Чемпионлар Лигасининг кетма-кет 4 ўйинида гол урган иккинчи футболчига айланди. Бунга қадар 2003 йилнинг апрель ойидан бери собиқ ҳужумчи Руд ван Нистелрой қаторасига 9 баҳсда ўз номини таблога ёздириб қўйган эди.

Маълумот учун, жорий мавсум 36 ёшли форвард ЕЧЛнинг 4 ўйинида 5 гол уришга муваффақ бўлди.