«Милан» бош мураббийи Массимилиано Аллегри «Палермо»га қарши ўйиндан сўнг ўз фикрлари билан ўртоқлашаркан, ўйин натижаси ҳаққоний эканини айтиб ўтди. Бу ҳақда «Милан» расмий сайти хабар бермоқда.
Италия чемпионати 26-тури доирасида бўлиб ўтган «Палермо» – «Милан» учрашувида россонерилар 4:0 ҳисобида ғалаба қозонишди. Ушбу ўйинда ҳужумчи Златан Иброҳимович алоҳида ажралиб турди — у хет-трикка эришди.
Аллегрининг сўзларига кўра, унинг шогирдлари ўйинни аъло даражада ўтказишган ва рақибга бирорта ҳам имкон беришмаган.
«Ўйин натижаси мантиқан тўғри. «Палермо», менинг шогирдларим саъи-ҳаракатлари самараси ўлароқ, ўйинда сезиларли ҳеч нарса қила олгани йўқ. Биз ўйинни аъло даражада ўтказдик», деди «Милан» устози.
«Бизнинг мақсадимиз — биринчи ўрин. Бунга эришиш учун эса ҳар бир ўйинга масъулият билан ёндашишимиз керак бўлади», дея қўшимча қилди Аллегри.