Castrol компания Евро-2012 гуруҳларини ўрганиб чиқиб, жамоаларнинг мусобақада ғолиб чиқиш имкониятларини чамалаб кўрди. Castrol EDGE Calculator хулосаларига кўра, Европа чемпионати финалида, ЖАР-2010 мундиалида бўлганидек, Испания ва Голландия терма жамоалари тўқнаш келишади. Амалдаги жаҳон ва Европа чемпионининг бу сафар ҳам совринни ўзиники қилиб олиш имконияти 53% деб баҳоланди.

Castrol EDGE Calculator тахминлари:

— Франция ва Португалия терма жамоалари гуруҳдан чиқиш учун энг кам имкониятга эга жамоалар;

— Айни пайтда бош мураббийсиз қолган Англия терма жамоаси ярим финалга қадар етиб бориб, финал остонасида Голландияга имкониятни бой беради;

— Ярим финалнинг иккинчи жуфтлиги Испания-Германия тўқнашуви бўлиши ва Киев финалига Испания йўл олиши 57%га тенг;

— Германия, Испания ва Голландия терма жамоаларининг ярим финалга чиқиш имкониятлари ҳамманикидан кўп — 70 ва ундан зиёдроқ фоиз дея баҳоланди;

— Чорак финалнинг энг кескин ўтиши кутилаётган ўйинида Италия терма жамоаси (ғалаба қозониш имконияти — 42%) Англияга (58%) мағлуб бўлади;

— Голландия терма жамоаси ўлим гуруҳи сифатида тан олинаётган В гуруҳини пешқадам сифати якунлайди, плей-офф раундларида Чехия ва Англияни ортда қолдириб, якунда кумуш медални қўлга киритади.

— Мусобақа мезбонлари — Польша ва Украина терма жамоалари қийинчилик билан бўлса-да, гуруҳ босқичидан ўтишади. Аммо турнирдаги иштирокларини чорак финалдаёқ якунлайдилар;

Шу ўринда таъкидлаш жоиз, экспертлар Россия терма жамоасининг гуруҳдан чиқиш имкониятларини 48,4 % га тенглиги қайд этилди. Дик Адвокаат шогирдлари ўрин олган А гуруҳида Польша (56,7 %) биринчи, Чехия (54,0 %) эса иккинчи ўринни олиши тахмин қилинмоқда. Россия терма жамоаси эса гуруҳнинг статистик аутсайдери мақомига лойиқ кўрилган.