ОЧЛ доирасидан ўрин олган “Ал-Иттиҳод” ва “Пахтакор” жамоалари учрашувидан олдин жамоалар вакиллари ва учрашув ташкилотчилигига алоқадар шахслар учун митинг  ташкил қилинди. Бу ҳақда “Пахтакор” расмий сайти хабар тарқатмоқда.

Унда учрашув комиссари бошчилигида турли ташкилий масалаларга ойдинлик киритилди. Ишқибозлар стадионга қўйилмаслиги сабабли фақатгина расмий шахслар беллашувни кузатиб бориш имкониятига эга бўлишади. Мезбон жамоа эса стадион яқинидаги майдонда экран орқали учрашувни томоша қилиш имкониятини ашаддий мухлисларига яратиб бермоқчи.

Мезбонлар асосий либослари сариқ-қора рангли футболкаларда майдонга чиқишади. "Шерлар" эса оқ рангли футболка, шорти ҳамда гетриларда учрашувда иштирок этишади. Дарвозабон либоси эса кўк-қора-оқ рангда бўлади. Эслатиб ўтамиз, шаҳзода Абдуллоҳ Ал Файсал номидаги стадиондаги учрашув Тошкент вақти билан эртага соат 22:35да бошланади. Бугун 22:00да эса жамоамиз расмий машғулотни ўтказади.

Учрашув расмийлари рўйхати билан қуйида танишиб олинг:
Ҳакамлар: Тожо Минору, Наги Тошиюки, Оцука Харухиро, Иида Жумпей (Япония)
Комиссар: Айман Ҳорун (Иордания)
Назоратчи: Виктор Колпаков (Қирғизистон).