Матбуот  анжуманининг иккинчи қисмида жамоамиз бош мураббийи Рўзиқул Бердиев иштирок этди.

Рўзиқул Бердиев:

- Аввало “Ал-Жазийра” жамоасини ғалаба билан табриклайман. Ўйлайманки, учрашув тақдирини биринчи бўлимда ҳал этишимиз зарур эди. Кўплаб вазиятларда имкониятлардан фойдала олмадик.

Футболда шундай қоида бор: “сен урмасанг, сенга уришади”. Бугун Кенжа Тўраев, Илҳом Шомуродовларда кўплаб қулай вазиятлар бўлди. Афсуски, улар бундан фойдалана олишмади. Ҳимояда ҳам бугун кўплаб хатоларга йўл қуйдик. Футболчиларимизга ўйин амалиёти камлик қилди.

- Кейинги уччала учрашувни жамоа сафарда ўтказади. Бу мағлубият бу учрашувларга салбий таъсир кўрсатмайдими?

- Биз ҳар қандай ўйинга фақат ва фақат ғалаба учун майдонга тушамиз. Ўйлайманки, жамоам бу мағлубиятни тезда унутиб, келаси учрашувларга тайёрланади.

- “Ал-Жазийра” нимани эвазига ғалаба қозонди деб ўйлайсиз?

- Уларнинг сафида кўплаб тажрибали ижрочилар йиғилган. Иккинчи бўлимда улар икки нафар ҳужумчи билан ҳаракатланишди. Ҳисоб тенглашганидан сўнг биз уч нафар ҳужумчилардан фойдаландик, аммо афсуски бу самара бермади.

- Бугун кўплаб имкониятлардан ҳужумчиларимиз фойдала олишмади. Мавсум олди йиғинлар чоғида жамоага тажрибалироқ ҳужумчини топиш имконияти топилмадими?

- Биласизлар, кўплаб футболчилар кўригимизда қатнашишди, аммо бизнинг талабга жавоб бера оладиган ҳужумчилар топилмади.

- Шуҳрат Мирхолдиршоев нега бугун майдонга кўринмади?

- Рақиблар сафида кўплаб буйдор ҳимоячилар тўп суришади. Шунинг учун бугунги ишлаб чиқилган тактикамизга кўра буйдор футболчилардан фойдаландик. Ишонаманки, кейинги учрашувларда Шуҳрат жамоамизга ёрдам беради.