Суперлиганинг 26-тур доирасидан ўрин олган “Навбаҳор” - “Қўқон-1912” баҳси 27 ноябрь куни Наманган шаҳридаги “Марказий” стадионида бўлиб ўтади. “Водий дербиси” олдидан ушбу жамоаларнинг ўзаро ўйинлардаги статистик маълумотлари билан таништириб ўтамиз.
Ўзаро ўйинлар
“Қўқон-1912” ҳамда “Навбаҳор” клублари шу кунгача 31 бор куч синашишган. 7 та учрашувда “Қўқон-1912”нинг қўли баланд келган. “Навбаҳор” 17 та ўйинда ғалаба қозонган. 7 та ўйинда дуранг натижа қайд этилган. Тўплар нисбатида устунлик “лочинлар” томонида: 58-33. “Навбаҳор” ўзаро ўйинларда 58 очкога эга бўлган, “Қўқон-1912” эса 28 очкони қўлга киритган.
Ушбу жамоаларнинг сўнгги олтита учрашувда қайд этилган натижалари билан танишинг:
01.08.2021 Қўқон 1912 – Навбаҳор - 1:2
03.12.2020 Қўқон 1912 – Навбаҳор - 1:1
28.08.2020 Навбаҳор – Қўқон-1912 – 0:1
01.12.2019 Қўқон 1912 – Навбаҳор - 1:1
10.03.2019 Навбаҳор – Қўқон-1912 – 1:1
31.03.2018 Қўқон 1912 – Навбаҳор - 1:0
"Водий дерби"сини Абдурашид Худойберганов бошқариб боради
ЎзПФЛ Coca Cola суперлигасининг сўнгги турида фаолият олиб борадиган расмий шахслар рўйхатини эълон қилди. Унга Намангандаги "марказий" стадионида бўлиб ўтадиган "Навбаҳор" ҳамда "Қўқон-1912" жамоалари ўртасидаги учрашувни ёш ва иқтидорли ҳакамлардан бири Абдурашид Худойберганов бошқариб борадиган бўлди. Бунга қадар Худойберганов жамоамиз иштирокидаги битта баҳсда ишлаган. Навоийда бўлиб ўтган , суперлиганинг 15 туридан ўрин олган ва Абдурашид Худойберганов бошқариб борган "Қизилқум" - "Қўқон-1912" жамоалари ўртасидаги баҳс 2-2 ҳисобидаги дуранг натижа билан якунланган эди.
Суперлига.
26-тур
27 ноябрь, шанба
НАВБАҲОР – ҚЎҚОН-1912
Ҳакамлар: Абдурашид Худойберганов, Абдуҳамидулло Расулов, Олим Абдувосилов, Фарруҳ Янсупов
Назоратчи: Маъмур Саидқосимов
Комиссар: Қудрат Мадраимов
Бошланиш вақтлари
"Навбаҳор" – “Қўқон-1912” учрашуви, шанба куни Наманган шаҳридаги “Марказий” стадионида соат 15:00 да старт олади. Бугун эса ушбу жамоаларнинг ўринбосарлари U-21 биринчилиги 26-турида майдонга тушишади. Мазкур учрашув Наманган шаҳридаги “Марказий” стадионнинг захира майдонида ўтказилади. Баҳснинг бошланиш вақти – 14:00га белгиланган.
