Хабарингиз бор, бир неча кун илгари немис мутахассиси Ральф Рангник "Манчестер Юнайтед"да иш бошлаши эълон қилинди. Аввалдан футбол ичида юрган селекционер "қизил иблислар" жамоасига кимларни таклиф қилиши мумкинлиги ҳақида қуйидаги мақоламизда фикр юритиб кўрамиз.
Аслида Рангник аллақачон клубда ислоҳотларни бошлаб юборган. "Bild" нашри хабарига кўра, Ральф "Манчестер Юнайтед" раҳбариятига асосий трансфер режаларини эълон қилган. Маълум бўлишича, у Манчестерга ўз вақтида машҳур бўлган "Ред Булл" тизимининг энг яхши битирувчиларини олиб келмоқчи.
У кимларни сотиб олмоқчи?
Хабар қилинишича, асосий мақсадлардан бири – Тимо Вернер. 25 ёшли ҳужумчи Рангник қўл остида узоқ вақт давомида ажойиб ўйинлар намойиш қилган ва Бундеслиганинг энг яхши тўпурарларидан бири бўлган. Англия чемпионатида эса Вернернинг омади юришмади. Немис футболчиси "Челси" билан бирга Чемпионлар лигасида зафар қучишган бўлса-да, у индивидуал миқиёсида ўзини кўрсата олмади. 53 миллион еврога сотиб олинган футболчи АПЛнинг 35 ўйинида бор ёғи 6 бор рақиблар дарвозасини ишғол қилди. Албатта, "аристократлар" раҳбарияти ва мухлислар Тимодан кўпроқ нарса кутишган эди.
Жорий мавсум ҳам Вернернинг ўйинида деярли ўзгариш йўқ. Англия Премьер-лигасининг 14 туридан сўнг турнир жадвалида пешқадамлик қилаётган "Челси"нинг ғалабаларида унинг ҳиссаси жуда кам: 8 ўйин, 1 гол. Рангник эса футболчи билан қандай ишлаш кераклигини билади ва уни Манчестерга олиб келмоқчи. Хабарларга кўра, ҳужумчига "Манчестер Юнайтед"дан ташқари "Боруссия Д" ва "Бавария" ҳам таклифлар бор. Якуний қарорни эса Тимонинг ўзи қабул қилади.
Шунингдек, немис мутахассиси Вернердан ташқари "қизил иблислар" сафига икки "Лейпциг" футболчиларини таклиф қилмоқчи. Улар – Кристофер Нкунку ва Амаду Айдара.
Нкунку Жесси Марш бошчилигидаги "буқалар"нинг ҳақиқий етакчиси. У биргина Чемпионлар лигасидаги жамоаси киритган 13 голдан 8 тасида иштирок этган. Футболчининг ўйини тезкорлик билан ривожланиши натижасида унинг нархи бир йилда 47 миллион еврога қадар кўтарилди. Нкункуни МЮдан ташқари "Реал" ва ПСЖ ҳам ўз сафига қўшиб олиш ниятида. Амаду Айдаранинг трансфер нарҳи эса бор йўғи 23 миллион еврога баҳолаган ва унга фақатгина "Манчестер Юнайтед" даъвогарлик қилмоқда.
Рангникнинг клуб трансфер бозорида олдига қўйган энг олий мақсади Эрлинг Холандни қўлга киритиш бўлиб турибди. Тўғри "Боруссия Д" норвегиялик "қотил"ни қўйиб юбориш нияти йўқ, аммо жамоа учун фойдали таклифлар бу қарорни ўзгартириши мумкин. Холанд учун асосий даъвогар "Реал Мадрид" ҳисобланади. Аммо Рангник футболчининг отаси (бир вақтнинг ўзида агенти) билан яхши танишлиги, Эрлингнинг навбатдаги манзилини ўзгартиришига туртки бўлиши мумкин.
У кимлардан қутулмоқчи?
Янги трансферлар учун жой топиш ва молиявий фэйр-плей қоидаларига риоя қилиш учун ҳам клуб ўзининг бир неча футболчилари билан хайрлашишга тўғри келади. Қишнинг ўзида жамоани тарк этиш учун асосий даъвогар футболи – Донни ван де Бек. "Аякс"дан МЮ сафига келиб қўшилган иқтидорли ярим ҳимоячи ҳозирда деярли ўйин амалиётисиз қолиб кетмоқда. Бу эса табийки футболчига ёқмаяпти. У жамоани тарк этиш учун ҳаттоки ўз агентини ҳам алмаштиришга улгурди. Айни вақтда унга Европа грандлари "Ювентус", "Реал" ва "Барселона"дан ташқари "Арсенал" ва "Вулверхэмптон" каби жамоалардан ҳам таклифлар борлиги ҳақида миш-мишлар мавжуд.
Шунингдек, ҳозирда араб шайҳлари қўлига ўтган "Ньюкасл" Манчестернинг бира тўла икки нафар заҳирасида қолиб кетаётган футболчилари Жесси Лингард ва Дин Хендерсонни ўз сафига қўшиб олиш истагида юрганликларини яширишмаяпти.
Ван ниҳоят, клубдан кетиши кутилаётган яна бир ўйинчи Антони Марсьяль ҳисобланади. Франциялик "Олтин бола" ҳеч қачон "қизил иблислар" сафида ўзини яққол етакчилигини кўрсата олмаган. Тўғри, бир неча ўйинларда фантастик ўйинлари билан ёдда қолган бўлиши мумкиндир, аммо у ҳеч қачон юлдузга айланмади. Ўтган мавсум 22 ўйинда майдонга тушган Антони бор йўғи 4та гол уришга эришган бўлса, жорий йилда унинг ҳисобида 1та гол бор. Футболчининг ўзи фаолиятини бошқа клубда давом эттирмоқчи. У учун ҳозирда энг яқин вариант "Ювентус" бўлиб турибди.
****
Хуллас калом, немис мутахассиси қўл остида жамоада бутунлай бошқа тизим ўрнатиладигандек, гўё. Рангникнинг футбол бўйича билим ва тажрибалари қай даражада клубни ўзгартириши мумкин деган саволга эса яқин бир неча ойларда жавоб оламиз. Ҳозирча эса фақат кузатамиз.
