«Наполи» президенти Аурелио Де Лаурентис Италия чемпионатига бўлган қизиқишни қандай қилиб ошириш мумкинлиги ҳақидаги ўз фикрлари билан ўртоқлашди. Бу ҳақда «Football Italia» нашри хабар бермоқда.
«Менимча, чемпионатнинг энг кучли тўрт жамоаси ўртасида плей-офф ўйинларини ташкил этиш керак. Нима бўлишини тасаввур қилаяпсизми!», деди «Наполи» эгаси.
«Бундай янгилик, катта эҳтимол билан, мусобақага бўлган қизиқишни оширади. Ҳозирги футболда ўтмиш билан кучли боғлиқлик бор, бироқ келажакка назар солиш вақти келди», дея қўшимча қилди «Наполи» президенти Аурелио Де Лаурентис.
Маълумот ўрнида таъкидлаш жоиз, айни вақтда Италия «А» Сериясида дастлабки тўрт ўринни «Милан», «Ювентус», «Лацио» ва «Наполи» жамоалари эгаллаб турибди.