Осиё Чемпионлари лигасининг 2-турида “Насаф”га рақиблик қиладиган Теҳроннинг “Истиқлол” жамоаси Эрон чемпионатининг 26-турида дурангга имзо чекди.

Парвез Мазлумий мураббийлик қилаётган “Истиқлол” футболчилари Али Дайи бошчилигидаги “Роҳи Оҳан” клубига қарши ўйинда биринчи бўлимнинг учдан бир қисми ортда қолаётган бир пайтда ўз дарвозаларидан икки тўп олиб чиқишга мажбур бўлишди.

Аммо 24-дақиқада “Истиқлол”нинг тринидадлик ҳимоячиси Жлойд Самуэл орадаги фарқни қисқартирган бўлса, иккинчи бўлимнинг еттинчи дақиқасида яна бир ҳимоячи Пежман Мунтазерий мувозанатни тиклади - 2:2.

Айни пайтда “Истиқлол” футболчилари 26 учрашувдан 48 очко тўплаган ҳолда турнир жадвалида пешқадам “Сепаҳон” жамоасидан тўрт очко ортда қолишмоқда.

Эслатиб ўтамиз, “Истиқлол” – “Насаф” учрашуви 20 март куни Теҳрондаги “Озодий” стадионида маҳаллий вақт билан соат 19:00 (Тошкент вақти билан соат 20:30)да бошланади.