Германиялик мутахассис илк ўйинидан илгари матбуот анжуманида ва бундан ташқари «Манчестер Юнайтед» расмий канали учун интервью бериб қуйидаги фикрларни билдирган.

Роналду ҳақида
Мен унинг "Арсенал"га қарши ўйиндаги ҳаракатларини кўрдим. Ҳеч қачон 36 ёшдаги футболчининг бундай юқори даражада ўйнаганини кўрмаганман. У ҳали ҳам ўйинлар тақдири ҳал қилиши мумкин бўлган профессионал. Бироқ мен фақат Роналдунигина кузатмадим, бутун жамоани ўргандим. Биз турфа хил услублар қоришиб кетган дунёнинг кучли лигасида ўйнаяпмиз. Таркибда сифатли футболчилар кўп бўлиши муҳим. Кўрганларим бўйича айтишим мумкинки, Роналду жамоадошлари ёрдамида клуб учун борини беришга тайёр.

Кэррик ҳақида
Мен уни клубда олиб қолишни истадим. Бир неча соат мобайнида уни бунга ишонтиришга уриндим, аммо бунинг иложи бўлмади. Энди яқин ҳафталар ичида мен жамоага 2-3 кишини таклиф этаман.

Ўйин назорати ҳақида
Футболда ўйиннинг боришини назорат қилиш ўта муҳим. Тўп билан сен бўласанми ёки рақибми фарқи йўқ. Учрашувни бошқара билиш лозим. «МЮ»да бу билан муаммо бор. Ҳатто "Уотфорд"га қарши ўйинда ҳам назорат бизда эмасди. Яқин ҳафталар ичида шунинг устида ишлаймиз.

Трансферлар ҳақида
Таркибимизда бизга керак бўлган савияли футболчилар жуда кўп. Ўйлашимча, қишки трансферлар ҳақида раҳбарият билан суҳбат бўлади, лекин мен уларни энг тўғри йўл деб билмайман. Таркибга келадиган футболчи ҳар томонлама устун сифатларга эга бўлиши керак. Қишда эса бундайини топиш осон эмас.

Англия премьер-лигаси. 15-тур
"МАНЧЕСТЕР ЮНАЙТЕД" - "КРИСТАЛ ПЭЛАС"
FUTBOL TV. 19:00.