"Барселона" ПСЖдан нидерландиялик ярим ҳимоячи Хави Симонсни қайтаришни истамоқда, деб хабар беради "Diario Sport".
Манба берган хабарга кўра, Каталония клуби президенти Жоан Лапорта ярим ҳимоячининг агенти ҳисобланган Мино Райола билан учрашган. Симонснинг ПСЖ билан шартномаси 2022 йилнинг ёзида тугайди. "Барселона" эса ушбу вазиятдан фойдаланиб Симонс билан текинга шартнома тузмоқчи.
18 ёшли Симонс 2019 йилдан буён ПСЖда ўйнаб келмоқда. Умуман олганда, у Париж клубининг асосий жамоасида иккита ўйин ўтказди. Хави бу мавсумда УЕФА Ёшлар лигасининг олтита ўйинида майдонга тушди ва учта гол урди.
