"Лестер" клуби бугун тунда "Тоттенхэм"ни қабул қилиши керак эди. Аммо мезбонлар таркибида кўплаб футболчилар коронавирусдан зарарланганлиги сабабли ушбу ўйин қолдириладиган бўлди.
Сўнгги маълумотларга кўра, "тулкилар"нинг 9та футболчиси инфекция юқтириб олган. Бу ҳақида Бренден Рожерс шундай дейди:
"Биз ҳали ҳам бир нечта футболчиларимиздан фойдалана олмаймиз. Умумий миқдорда тўққизта ўйинчи вирус ва бошқа тиббий сабаблар туфайли майдонга туша олмайди. Шу сабаб бугунги ўйинда қатнаша олмаймиз".
Эслатиб ўтамиз, Рожерс жамоасининг бугунги рақибларида ҳам вирус билан боғлиқ муаммолар бор эди.
