Хабарингиз бор, Ўзбекистон Олимпия терма жамоасини 2022 йилда иккита йирик мусобақа — мамлакатимиз майдонларида бўлиб ўтадиган U23 Осиё кубоги ва Ханчоудаги Осиё ўйинлари кутиб турибди.
Футболчиларимиз қисқа муддатли таътилдан қайтганларидан сўнг ушбу турнирларга тайёргарлик бошланди. Аввал хабар берганимиздек, Олимпиячиларимиз Тошкент ва Анталия шаҳарларида ўқув-машғулот йиғинлари ўтказишмоқда. Эртадан жамоа тайёргарликни Анталияда давом эттиради. Сафар олдидан ЎФА биринчи-вице президенти Равшан Эрматов жамоа билан учрашди.
Мураббийлар штаби томонидан жамоанинг тайёргарлик жараёни ҳақида тўлиқ маълумот берилди. Равшан Эрматов футболчилар билан суҳбатда бўлажак турнирлар аҳамияти, уларга тизимли ва сифатли тайёргарлик кўриш, юртимиз шарафини муносиб ҳимоя қилиш зарурлиги ва доимий равишда меҳнат қилиб, ўз даражасини ошириб бориш муҳимлиги ҳақида гапириб ўтди. Тайёргарлик жараёнида барча деталларга эътибор қаратиш борасида кўрсатмалар берди. Ўз навбатида ЎФА томонидан бу борада барча шароитлар тақдим этилиши эътироф этилди.