"Қизилқум"нинг яхши ўйин кўрсатишида "Пахтакор"дан ижарага олинган футболчиларнинг ҳиссаси катта эканини Равшан Ҳайдаров ўйиндан кейинги матбуот анжуманида таъкидлади.

Равшан ҲАЙДАРОВ ("Қизилқум"):
— Биринчи ўйинда футболчиларни ҳаяжон босиши бор гап. Шунинг учун ҳам ўйин сифати юқори бўлмади. Шунга қарамай учрашув шиддатли ўтди. Барибир баҳорий футбол сезилиб турди. Бизда ҳали жамоавий ўйин шаклланмаган. Ушбу дуранг ҳаққоний бўлди, деб ўйлайман. Мезбонларга қараганда яққол хавфли вазиятлар бизда кўп бўлди.

— Жамоа олдига қандай вазифа қўйилган?
— Ўтган йили жамоа олий лигадан чиқиб кетганди. Аммо ўзига хос сабаблар билан "Қизилқум" олий лигада қолдирилди. Асосий вазифамиз — ўтган йилги хатоларни қайтармасдан, рақобатбардош жамоа шакллантириш. Жамоамиз фақат ўртамиёна ёки аутсайдер бўлиб қолишини истамайман.

— Бугун кўпроқ "Пахтакор"дан таклиф этилган ўйинчилар яхши ўйин кўрсатишди. Ушбу футболчиларни яхши билганингиз учун жамоага таклиф этдингизми?
— Ҳа, худди шундай. Ўзи январь охирларида машғулотларни бошлагандик. Бундай тиғиз вақтда янги жамоа тузиш қийин эди. Шунинг учун ўзим билган футболчиларни чорладим. Бу вақтинчалик ҳолат. Футболчиларнинг ижара асосида ўйнаб, яна ортга қайтиши яхши эмас. Ҳар бир жамоа ўз футболчисига эга бўлиши лозим. Биз шунга ҳаракат қиламиз. Айни шу футболчилар орқали жамоадаги руҳият ўзгариши кузатилиши мумкин. Лекин ҳозирча ижара асосида ўйнатишга мажбурмиз.

— "Қизилқум"га легионерлар таклиф этилмаганинии сабаби нимада?
— Тўғрисини айтганда, ҳозиргача кўп легионерларни кўрдик. Аммо ҳаммаси ҳам талабга жавоб бермади. Бир марта кўриб, уларга жавоб бериб юбордик. Ҳозирда таркибда битта россиялик легионер бор. Бугун жароҳати борлиги учун Косонсойга келмади.