Жазоирнинг «Наполи» клуби ҳужумчиси Адам Унас Италия чемпионатининг 18-туридан ўрин олган «Милан»га қарши ўйин арафасида тунаб кетилган, дея хабар беради Football Italia.

Манбага кўра, футболчи машғулотдан қайтиш арафасида икки номаълум шахс уни ўзи яшаётган ҳудудда кутиб турган.

Улар жазоирликни гаражга олиб кириб, пул ва тақинчоқларни, жумладан, 5 минг евролик тилла занжирни ўғирлашган.

Ушбу воқеага қарамай, Унас «Наполи»нинг «Милан»га қарши қайдномасига киритилди. Учрашув эртага, 19 декабрь куни бўлиб ўтади. 

Маълумот учун, жорий мавсум 25 ёшли Унас «Наполи» сафида барча турнирлар доирасида 12 та ўйин ўтказиб, 2 та гол урди. Унинг клуб билан шартномаси 2023 йилнинг ёзига қадар амал қилади.