Биринчиликда иккинчи ўринни эгаллаган U-21 жамоаси таркибида мавсум давомида 41 нафар футболчи майдонга туширилди.
Ойбек Усмонхўжаев асосан академия тарбияланувчиларининг ўйин амалиётига эга бўлишига эътибор қаратди. Мавсум мобайнида U-18 жамоасидан кўплаб футболчилар ёшлар жамоаси сафида майдонга тушишди. Баъзан асосий таркиб ўйинчилари ҳам жароҳатдан тикланиш ва ўйин ритмини қайтариш мақсадида ушбу жамоага жалб этилди. Энг кўп баҳсда иштирок этган футболчи Аббос Эргашбоев бўлди. Унинг ҳисобида 23 учрашув ва 11 гол мавжуд. Шаҳзод Раҳматуллаев 22 беллашувда туширилган бўлса, Пўлатхўжа Холдорхонов 21 ўйинда қатнашиб, 11 гол муаллифига айланган. Аббос Файзуллаев ва Рустам Турдимуродов 6тадан тўп киритиб, жамоанинг навбатдаги тўпурарлари қаторидан жой олишган.
