"Ливерпуль" Дортмунднинг "Боруссия" клуби ҳужумчиси Эрлин Холандга қизиқиш билдирмоқда, дея хабар беради "Sky Sports Deutschland"

Манбанинг хабарига кўра, Мерсисайд клуби ёзги трансферлар вақтида марказий ҳужумчи сотиб олмоқчи. 21 ёшли норвегиялик жамоа ҳужумини кучайтириш учун энг яхши номзодлардан бири деб қаралмоқда.

Қайд этилишича, ҳужумчининг эҳтимолий трансфери "Ливерпуль" учун ҳужумчи Муҳаммад Салоҳ билан янги шартнома борасидаги музокараларда муаммога айланиши мумкин. 29 ёшли мисрликнинг талабларидан бири - таркибни жиддий равишда кучайтириш. Шунингдек, Салоҳнинг ўзи ҳам маошни оширишни сўрамоқда.

Холанд жорий мавсумда “Боруссия” сафида 16 та ўйин ўтказиб, 19 та гол урди ва 4 та голга ассистентлик қилди.