"Манчестер Юнайтед"нинг собиқ ҳимоячиси Микаэль Сильвестр "қизил иблислар" ҳужумчиси Криштиану Роналдунинг жамоага таъсири ҳақида гапирди.

«Уни жамоа учун муаммо деб изоҳлаш мутлақо бемаънилик. Мавсум бошидан бери урилган голлар ва яратилган имкониятлар нисбатига қаранг.

У жамоага ёрдам беришни, совринларни қўлга киритишни хоҳлайди. У "Юнайтед"га нафақага чиқиш олдидан дам олиш учун эмас, балки аввалги клублардагидан ҳам каттароқ вазифани уддалаш учун келган.

У "МЮ"ни "Олтин тўп", Премьер-лига ғолиби ва топ футболчи сифатида тарк этган. У жамоага нима бериши мумкинлиги ҳақида саволлар берилишини билар эди, лекин у етакчи. У сардорлик боғичини тақмайди, лекин у жамоани бошқаради ва унинг шу пайтгача қилган барча ишларини ижобий баҳолаш мумкин», - дейди Сильвестр.