ЎзПФЛ расмий сайти шу қадар тез ишлайдики, ҳатто шошилганидан айрим кичик хатоларга ҳам йўл қўяди. Албатта, иш бор жойда камчилик бўлади-да, тўғрими?

Аммо буни қарангки, ПФЛдаги ишларнинг ўта жадаллик билан олиб борилаётгани сабаб сайт энг БИРИНЧИ навбатда ёритиши шарт бўлган Олий лига ўйинлари қайдномаларини, аниқроғи жамоалар таркибини беришни, шунчаки, шошилганидан унутиб қолдирган. Бу биринчи марта эмас, ўрганиб кетганмиз, дейсизми? Яшанг, биз журналистлар ҳам қандайдир янгилик кутгандик, десак асло ишонманг...

Ўйинлардан шарҳлар, фотолар, статистикалар-у матбуот анжуманларини кутмагандик янги мавсумдаги янги сайтдан. Ҳеч бўлмаса, ўйин расмий қайдномасини оммага тўлиқ ва ва иложи борича тезроқ эълон қилишса, бас. Ўтган йили, йўқ умуман ҳар доим йўл қўйилаётган кичик хатолар ҳам жадваллар-у, рейтингларни оёғини осмондан қилиб, мустақил таҳлилчилар ва статистикачиларни роса қийнаб келаётганига қачонгача тоқат қилиш мумкин?

Pfl.uz расмий сайт ва ундаги маълумотлар ҳам расмий мақомга эга. Икки манбада икки хил маълумот келтирилганда аввало расмий қайдларга ишонилади. Лекин... Равшан Эрматов қайдномада Эрматов, ҳакамлар рўйхатида Ирматов дейилган бўлса-чи?

Ўзбекистон чемпионати Англия премьер лигасидан фарқли ўлароқ, жамоалар ўз заявкаларини 4-5 тур ўтганидан кейин эмас, мавсум бошланмасидан олдин лига рахбариятига топширадилар. Бу сафар тақвимни ҳам, заявкаларни хам анча кеч оммага ошкор қилган лига футболчиларни санашда хатоликка йўл қўйибди, чоғи. Бугун ўтказилган қайта ва қайта текширувлардан сўнг, 2012 йил учун олий лига жамоалари томонидан заявка қилинган футболчилар pfl.uz келтириб ўтганидек, 576 нафар эмас, 575 нафар эканлиги ойдинлашди. Агар кимдир қолиб кетган бўлса, қўшиб қўйишингизни сўрардик...

Камронбек ЧЕГАБОЕВ