Англия Премьер-Лигаси 19-турида «Норвич» клуби ўз майдонида Лондоннинг «Арсенал» жамоаси билан беллашади.
Мазкур баҳсдан олдин қизиқарли фактлар ва маълумотларни тақдим этамиз.
Биласизми?
"Норвич Сити" шу пайтга қадар бирор марта "Boxing Day"да ғалаба қозонмаган (1 дуранг, 6 мағлубият) ва ғалабасиз энг кўп ўйин ўтказган жамоа бўлиб турибди.
Айни пайтда «Норвич» 10 очко билан мусобақа жадвалининг энг сўнгги ўрнида бормоқда. Фақатгина уч жамоа "Boxing Day"дан олдин жадвалнинг охирги поғонасида бора туриб, якунда Премьер-Лигада жон сақлаб қола олган. Булар: "Вест Бромвич" (2004/05), «Сандерленд» (2013/14) ва «Лестер» (2014/15).
«Арсенал» "Boxing Day" кунлари 23 АПЛ ўйинидан фақатгина иккитасида мағлубиятга учраган: "Ковентри Сити" 3:2 (1999/00) ва «Саутгемптон» 4:0 (2015/16).
«Тўпчилар» жорий мавсумдаги илк ғалабасини «Норвич»га қарши баҳсда қўлга киритганди. Лондонликлар фақат икки марта ушбу жамоага қарши мавсумнинг иккала ўйинида ҳам уч очко эгасига айланган (2004/05 ва 2013/14).
"Норвич Сити" ва «Арсенал» ўйини учун Греҳем Скотт бош мураббий этиб тайинланган. Унга қанотларда Ричард Вест ҳамда Дерек Итон ёрдам беришади.
Баҳс расмийлари
Бош ҳакам: Греҳем Скотт
Қанот ҳакамлари: Ричард Вест, Дерек Итон
Захира ҳаками: Дин Уайтстоун
ВАР: Ли Мейсон
ВАР ёрдамчиси: Саймон Лонг
Тахминий таркиблар
«Норвич»: Крул, Ааронс, Кабак, Гибсон, Уилямс, МакКлин, Рупп, Гилмур, Кантуэлл, Плакета, Пукки
«Арсенал»: Ремздейл, Томиясу, Уайт, Магаляеш, Тирни, Парти, Жака, Сака, Эдегор, Мартинелли, Ляказетт.
Жамоалар хабарлари
Мелоу, Рупп, Саржент ва Тзолис коронавирусдан тузалиб сафга қайтишди ва улар майдонга тушишлари мумкин.
Озан Кабак уй учрашувида ўз имкониятини ишга солиши мумкин, аммо Кристоф Зиммерманн, Грант Хенли, Эндрю Омобамиделе ва Милот Рашитса қатнашмайди.
Маттиас Норман жарроҳлик амалиётини ўтказиши керак, буни Дин Смит тасдиқлади.
Мураббий, шунингдек «Норвич» қароргоҳида коронавирус ҳолатлари қайд этилганини тасдиқлади, аммо қайси футболчиларда мусбат натижа чиққанини ошкор қилгани йўқ.
Калум Чемберс ва Пало Марида коронавирус ҳолати қайд этилган. Мейтленд-Найлс эса бу касалликка чалинмаган бўлсада, иккита ўйинни ўтказиб юборди ва бугунги учрашувда майдонга тушиш учун машғулотларни давом эттирмоқда.
Локонга манфий тест натижасидан кейин машғулотларга қайтди. Микел Артета Такеҳиро Томиясу майдонга тушишини умид қилмоқда. Жамоа сўнгги турда «Лидс»ни 4:1 ҳисобида мағлуб этган баҳсда унинг ўрнини Соареш тўлдирганди. Бош мураббий ўтган турдаги асосий таркибни майдонга тушириши мумкин ва зарурият юзасидан Томиясунинг ўрни Соареш билан тўлдирилиш эҳтимоли ҳам йўқ эмас.
Рақамлар
«Норвич» АПЛ доирасидаги охирги 27 ўйиндан 25тасида ғалаба қозона олмади.
«Норвич» Премьер-Лига доирасидаги сўнги 3 уй учрашувида гол уришни уддасидан чиққани йўқ.
«Арсенал» Англия чемпионати доирасида ўзининг сўнгги 3 учрашувида ғалаба қозонди.
Лондонликлар барча мусобақаларда «Норвич»га қарши сўнгги 9 ўйиндан бери мағлубиятга учрамай келишмоқда.
Жамоалар АПЛда ўзаро 19 марта тўқнаш келишган. 10 ўйинда «Арсенал»нинг қўли баланд келган бўлса, 2 учрашувда «канарейкалар» ғалаба қозонишган. 7 беллашувда дуранг натижа қайд этилган.
Айни вақтда 32 очко тўплаган Микел Артета шогирдлари мусобақа жадвалининг 4-поғонасида боришмоқда. Мусобақа аутсаедери «Норвич» ҳисобида эса 10 очко мавжуд.
Ушбу ўйин Тошкент вақти билан 20:00да бошланиши режалаштирилган.
