"BBC" маълумотларига кўра, "Челси" 2021 йил 30 июнда якунланган молиявий йил учун солиқлардан кейин 145,6 миллион фунт стерлинг зарар кўрган.

Манба берган хабарга кўра, "Челси"нинг айланмаси телекўрсатувлардан тушган даромадлар туфайли 387,8 миллион фунтдан 416,8 миллионга кўтарилган.

Лондон клуби зарар кўришининг асосий сабаблари қаторида коронавирус туфайли ўйинларни томошабинларсиз ўтказиш ва футболчиларни сотишдан тушган даромаднинг камайгани ҳам бор.

“Аристократлар” клуб эгаси Роман Абрамовичга тегишли "Fordstam Limited" компаниясидан молиявий ёрдам олишда давом этмоқда. Ҳисоботлар "кўклар" "тегишли компаниялар" дан 1 миллиард фунт стерлингдан ортиқ қарздорлигини тасдиқлайди.

30 июндан буён лондонликлар жами 109,7 миллион фунт стерлингга учта футболчини сотиб олишди: ҳужумчи Ромелу Лукаку, дарвозабон Маркус Беттинелли ва ярим ҳимоячи Сауль Нигес.

Худди шу даврда улар 13 нафар футболчини жами 103,7 миллион фунт стерлингга сотишди. Шу билан бирга, "Челси" яна 16,4 миллионгача футболчилар трансферидан бонус олиши мумкин.