Аваз Маҳсумов мураббийлигидаги Ўзбекистон аёллар футзал терма жамоасининг 21 март куни Манамага йўл олгани ҳақидахабар бериб ўтгандик.
Унга кўра терма жамоа Баҳрайн аёллар футзал терма жамоасига қарши 3та ўртоқлик ўйинида майдонга тушиши керак эди. 21 март кечаси Манамага етиб борган Ўзбекистон терма жамоаси, рақиб илтимосига кўра сафарнинг эртаси куниёқ Баҳрайнга қарши илк ўртоқлик ўйинида залга чиқди. Беллашувда Насиба Турсунова, Зебо Жўраева ва Маҳфуза Туропова томонидан киритилган голлар Ўзбекистон терма жамоасининг ғалабасини таъминлади – 3:2. Ҳисоб 2:2 бўлиб турган бир пайтда бош мураббий Аваз Маҳсумов дарвозабон ўрнига бешинчи ўйинчини майдонга туширишга қарор қилди. Шундан кейин учрашув якунига қадар устунликни ўз қўлида ушлаб турган Ўзбекистон ўйин тугашига саноқли дақиқалар қолганида ғалаба голини киритишга муваффақ бўлди.
Мазкур йиғин 2013 йил Сеулда бўлиб ўтадиган усти ёпиқ бинолардаги IV Осиё ўйинлари олдидан тайёргарлик вазифасини ўтаб беради.
