Осиё Чемпионлар лигаси гуруҳ босқичи 3-тур ўйинларидан ўрин олган «Гамба Осака» – «Бунёдкор» учрашувини эронлик ҳакамлар бошқариб боришади.

Ўзбекистон чемпиони «Бунёдкор» ОЧЛ «E» гуруҳи 3-турида Японияда маҳаллий «Гамба Осака» жамоасига қарши майдонга тушади. Учрашув 3 апрель, сешанба куни Осака шаҳрида бўлиб ўтади.

Ушбу учрашувни Муҳсин Туркий бошлиқ эронлик ҳакамлар бригадаси бошқариб боради. Ён қанотларда Ҳасан Камронифар ва Муҳаммадризо Мансурий ёрдам берса, Муҳсин Қаҳрамоний тўртинчи ҳакам сифатида қайд этилган.

Эслатиб ўтамиз, ОЧЛ гуруҳ босқичи 1-турида ўз майдонида «Аделаида»га 1:2 ҳисобида имкониятни бой бериб, 2-турда Жанубий Кореянинг «Поханг» клубини сафарда 2:0 ҳисобида мағлубиятга учратган «Бунёдкор» ўз гуруҳида иккинчи ўринни эгаллаб турибди.

Маълумот ўрнида айтиш жоиз, Ўзбекистон вице-чемпиони «Насаф» иштирокидаги ўйинни Юичи Нишимуранинг гуруҳи бошқариб борса, «Пахтакор»нинг «Ал-Араби»га қарши ўйини австралиялик ҳакамларга ишониб топширилган.

ОЧЛ, «Е» гуруҳи, 3-тур
3 апрель, сешанба
«ГАМБА ОСАКА» (Япония) – «БУНЁДКОР» (Ўзбекистон)
Бош ҳакам: Муҳсин Туркий (Эрон).
Ён қанот ҳакамлари: Ҳасан Камронифар, Муҳаммадризо Мансурий (иккиси ҳам – Эрон).
Тўртинчи ҳакам: Муҳсин Қаҳрамоний (Эрон).
Назоратчи: Ричард Лоренц (Австралия).
Комиссар: Кемел Тўкабаев (Қирғизистон).