Англия Премьер-лигаси 21-тури доирасида “Челси” 2 январь куни Лондондаги “Стемфорд Бриж” стадионида “Ливерпуль”ни қабул қилди. Жамоалар 2:2 ҳисобидаги дурангга имзо чекишди.
“Ливерпуль”нинг мисрлик ҳужумчиси Муҳаммад Салоҳ учрашувда гол урди. 29 ёшли футболчи АПЛда кетма-кет бешинчи мавсумда 25 ёки ундан кўп гол+ассист натижасини қайд этмоқда.
Англия чемпионатининг жорий мавсумида унинг ҳисобида 16 та гол ва 9 та голли узатма бор. Фақатгина Тьерри Анри АПЛ тарихидаги энг узун серияга эга бўлиб, у кетма-кет 7 мавсумда - 1999 йилдан 2006 йилгача 25 дан ортиқ муваффақиятли ҳаракатларни амалга оширган.
Эслатиб ўтамиз, Муҳаммад Салоҳ 2017 йилнинг ёзида "Рома"дан "Ливерпуль"га ўтган эди.
