Хабарингиз бор, Суперлига ҳамда Про лигада иштирок этаётган клубларга ажратилаётган маблағларнинг мақсадли сарфланишини мониторинг қилиш мақсадида Вазирлар Маҳкамасининг 2021 йил 30 апрелдаги “Футбол клублари фаолиятининг самарадорлигини ошириш чора-тадбирлари тўғрисида”ги 261-сонли қарорига мувофиқ профессионал футбол клубларининг йиллик харажатлар сметаси ЎФА билан келишилган ҳолда тасдиқланиши белгилаб қўйилган.
Барча футбол клублари 2022 йилги харажатлар сметаси лойиҳасини аллақачон ишлаб чиқиб, якунда ЎФАга келишиш учун тақдим этмоқда.
Бунда аввало клубларнинг инфратузилма ва академияни ривожлантириш масаласига маблағ йўналтиришини таъминлаш учун ЎФА ва ЎзПФЛ вакилларидан ташкил этилган махсус комиссия клубнинг йиллик харажатлар сметасида биринчи навбатда стадион ва майдон парваришига, академия ҳамда ўқув-машғулот қароргоҳини ташкил қилиниши, аёллар ва футзал жамоалари, шунингдек турли ёш тоифасидаги жамоаларнинг мусобақалардаги иштироки харажатлари акс этгани масаласини кўриб чиқиб, бу борада ўз таклиф ва тавсияларини бермоқда.
Бу орқали аксарият клубларда узоқ йиллардан буён ечим топмай келаётган инфратузилма бўйича камчиликлар босқичма-босқич бартараф этиб борилиши кўзда тутилган.
