«Милан»нинг франциялик ҳимоячиси Тео Эрнандес клуб билан янги шартномаси учун катта миқдордаги бонусларга эга бўлади.

24 ёшли франциялик футболчи Стефано Пиоли жамоасининг асосий ўйинчиларидан бири ва у Паоло Малдинига берган ваъдасини бажармоқчи, яъни «россонерилар» учун тарихий шахсга айланишга тайёр.

Маҳаллий хабарларга кўра, «Милан» Эрнандесга янги шартнома таклиф қилиш устида ишламоқда, унинг маоши 1,5 миллион евродан 4 миллион еврогача кўтарилади, шунингдек, бу бонуслар билан 5 миллион еврогача кўтарилиши мумкин.

Маълумот учун, 24 ёшли Эрнандес жорий мавсум барча мусобақалар доирасида 22 та ўйинда майдонга тушиб, жами 1813 дақиқа ўйнади. Бу вақт ичида у тўртта гол урди ва бешта голли узатмани амалга оширди.