Футзал бўйича мамлакат чемпионатининг 5-тур ўйинлари 13–15 январь кунлари Тошкент шаҳридаги “Юнусобод” спорт мажмуасида бўлиб ўтади. Мухлислар нафақат турнинг, балки чемпионатнинг марказий учрашувларидан бирини кузатиш имкониятига эга бўлишади. 14 январь кунига белгиланган тақвим ўйинида чемпионатнинг тўртинчи тури якуни бўйича бир хил очко (30 тадан) тўплаб, етакчилар қаторида бораётган АГМК ва “Локомотив” жамоалари ўзаро куч синашишади.
Айни пайтда тўртинчи турдан кейин АГМК ўн битта учрашувдан 30 очко тўплаган ҳолда пешқадамлик қиляпти. Олмалиқликлар биргина “HUAXIN-Жиззах” жамоасига имкониятни бой берган. “Локомотив” эса тўртинчи турга қадар юз фоизли натижа билан келди ва айнан шу турда АГМКдан мағлубиятга учради.
Ҳар иккала жамоа таркиб борасида бир-биридан кам эмас, иккаласида ҳам терма жамоа вакиллари ҳамда амалдаги чемпион футзалчилар тўп суришади. “Локомотив”да Акбар Усмонов, Машраб Адилов, Дилмурод Шавкатов, Равшан Элибоев каби тажрибалилар йиғилган бўлса, АГМКда Рустам Умаров, Суннат Жўраев, Авазбек Абдувалиев каби маҳоратли футзалчилар жамланган.
Олий лига доирасидаги сўнгги 5 та ўзаро учрашув
“Локомотив” – АГМК 1:5
“Локомотив” – АГМК 0:9
АГМК – “Локомотив” 3:0
“Локомотив” – АГМК 5:6
АГМК – “Локомотив” 3:1.
