Япониянинг “Гамба Осака” клуби бош мураббийи Хосе Карлос Серрао ва унинг штабини истеъфога чиқарилди. Бунинг сабаби — жамоа ўзи иштирок этган сўнгги 5та ўйинида мағлубиятга учради.

ОЧЛ-2008да ғолибликни қўлга киритган клуб ушбу мавсумда дастлаб ОЧЛ доирасида “Поханг Стилерс”га ўз майдонида, сўнгра “Аделаида Юнайтед”га сафарда мағлуб бўлди. Бу ўйинларда улар ўз дарвозаларидан 5та тўп ўтказиб юбориб, бирорта ҳам гол ура олмадилар. Шунингдек, март ойи бошида бошланган Жей-лига ўйинларининг 3-тур ўйинларидан кейин улар ҳисобида очколар ҳамон ноллигича қолмоқда. “Гамба” дастлаб ўз майдонида “Виссел Кобе”га 2:3 ҳисобида ютқазган бўлса, ундан кейин “Серезо Осака ва “Жубило Ивата”га имкониятни бой берди. Шундан сўнг жамоа раҳбарияти бразилиялик мураббий ва унинг ёрдамчиларини ҳайдашга қарор қилди.

“Жамоамиз Серраонинг ўйин услубига мослаша олмади ва мавсумни кетма-кет 5та мағлубият билан бошлади. Бу клуб тарихидаги энг ёмон натижадир. Шунингдек, “Гамба” намойиш қилаётган ўйин самарали эмас, деган фикрга келдик”, дейди клуб президенти Кикуо Канамори берган расмий баёнотида.

Клуб афсонасига айланган, “Гамба” сафида 280та ўйинда майдонда тушган Масанобу Мацунами жамоанинг янги бош мруаббий этиб тайинланди.

“Клубнинг салбий натижаларидан хабарим бор. Жамоани ғалабаларга олиб келиш учун ишлайман. Ўйинчилар, ходимлар ва мухлислар ғалаба қозонишни исташади ва биз бунга жиддий ҳаракат қиламиз”, дейди Мацунами.

Эслатиб ўтамиз, қуръага кўра “Гамба Осака” Ўзбекистоннинг “Бунёдкор”и билан ОЧЛнинг “Е” гуруҳига тушган ва 3 апрель куни ушбу жамоалар “Expo 70” стадионида тўқнаш келадилар.