Эрлинг Ҳолланднинг бўлажак трансфери айни дам Килиан Мбаппеникидан ҳам қизиқроқ тус олган. Ҳозирда «ПСЖ» ва «Реал» француз учун курашаётган бўлса, норвегиялик футболчига деярли барча топ-клублар оғиз солиб кўрди. Унинг «Боруссия» билан шартномаси 2,5 йилдан сўнг тугайди. Бироқ Эрлинг Дортмундда охиригача қўним топиши жуда қийин. талаб жуда юқори. Қуйида унинг бўлажак манзили қаер бўлиши ҳақида қисқача фикр юритамиз.
«Барселона»
Каталонияликнинг Ҳоланд агенти билан оғзаки келишуви мавжуд, лекин уни сотиб олишга пул ҳозирча етарли эмас. Жоан Лапортанинг шахсан ўзи Холандни Каталонияга жалб қилмоқчи. Буни «Барселона»нинг собиқ раҳбарларидан бири Луис Карраско ҳам тасдиқлади: «Лапорта Холандни жамоамизда кўрмоқчи эканини жуда яхши биламан. Қолаверса, Эрлингнинг ўзи ҳам ЕЧЛни ютиши бўлган жамоа таркибида ўйнашни мақсад қилганини рост», - дейди Карраско.
Шунингдек, Лапорта Эрлингнинг агенти Мино Райола билан ҳам яхши муносабатлар ўрнатган. Фабрицио Романонинг сўзларига кўра, 2021 йилнинг декабрида улар норвегияликнинг «Барселона»га ўтишини муҳокама қилишган. Ўшанда матбуот ҳатто Райоланинг Лапортага Холандни Каталонияга кўчиб ўтишга кўндиришга ваъда берганини ёзишган эди. Аммо бу жиддий сумма ва юқори уринишларни талаб қилади.
Бироқ бу ердаги асосий муаммо аслида бошқа ва кутилганидан ҳам жиддийроқ бўлиши мумкин. Айниқса, Ла Лига раҳбари Хавер Тебас бунга шубҳа билан қарайди. Холанд билан шартнома имзолаш учун «Барса» мавжуд бўлган маош фондини қисқартириши керак. «Биз ҳаммамиз бу борада «Боруссия»нинг қанча маош сўраётганини жуда яхши биламиз. Бу ҳолатда «Барса» деярли барча камоматларни қоплаши керак бўлади ва бу имконсиз. Чунки мен деярли 500 миллион евро ҳақида гапиряпман”, - дейди Тебас.
Шу жумладан, «Барса» аллақачон клубга янги ҳомий изламоқда - улар Япониянинг Ракутен компанияси билан ҳамкорликни давом эттиришни истамаяпти (айрим маълумотларга кўра, бу клубга йилига 55 миллион евро даромад олиб келмоқда ва мутасаддилар томонидан анча кам дея баҳоланди). Жерар Ромеронинг айтишича, энди клуб учун янада кучли ва «бақувват» компанияларни топиш вақти келган.
«Реал Мадрид»
Мадридликларда вазият бошқачароқ. Клубда Холандни сотиб олиш учун етарли пул бор, лекин жамоа унга ортиқча тўламоқчи эмас. Мадридликларнинг иқтидорли норвегияликнинг трансферидан у қадар ҳам кўнгли тўқ эмас. Marca нашрининг хабар беришича, «Реал» Эрлингнинг эҳтимолий трансферига нисбатан салбий кайфиятда. Жамоанинг асл мақсади эса Килиан Мбаппе. Шунга қарамай, Холанд интервьюларидан бирида фаолиятини айнан «қироллик клуби»да давом эттирмоқчилигига ишора қилган.
Журналист Жанлука Ди Марцио ҳужумчининг Ла Лигада ўйнашни хоҳлаётгани ҳақида кўплаб постларни эълон қилди. Мутахассис унинг эҳтимолий трансферида «Реал»нинг устунлигини юқори баҳолайди. «Айни дам Холандни сотиб олишга фақатгина «Реал» ёки «Барселона»нинг қурби етади холос. Ҳатто, у «Атлетико» ёки бошқа Ла Лига клубига ўтишни хаёлига ҳам келтирмаган. Балки шунинг учун ҳам у ўз агентига «Реал»га ўтишини ташкиллаштириши борасида хабар бергандир.
Агар бу иш ўхшамай қолса, катта эҳтимол билан унга иккинчи асосий даъвогар «Барселона» бўлиб қолади. Шундан кейин эса «Челси», «Манчестер Юнайтед» ва бошқалар билан кураш олиб бориши мумкин. Юқорида таъкидлаганимиздек, Холанднинг ўзи ҳам қачондир Испанияда ўйнашини айтган. У Марбелада ўтказган Рождество таътилида мухлисларга шуни ишора қилган эди.
Ҳозирда «Реал Мадрид»нинг молиявий аҳволи яхши. Ла Лига президенти Хавьер Тебас мадридликларда Холандни ҳам, Мбаппени ҳам сотиб олишга имконият борлигини айтди. Аммо «Реал» Мбаппени, «Барса» эса Холандни сотиб олса, лигага аввалги мавқе қайтишини таъкидлаган.
«Боруссия» уни сақлаб қола оладими?
Бу ерда дортмундликларнинг имкониятлари жуда кичик. Эрлинг эҳтимол, 2022 йилнинг ёзида Германияни тарк этади. Аммо форвард кейинги олти ойни албатта Дортмундда ўтказади. «Холанд январда ҳеч қаёққа кетмайди. Вариантларнинг бўлиши ҳам мумкин эмас. Европанинг энг яхши ҳужумчисини қишки танаффус вақтида осонгина сотиб юборишга ким ҳам рози бўларди? Мавсум оралиғида уни сақлаб қолиш албатта, қийин. Лекин биз буни амалга оширишга ҳаракат қиламиз», - дейди клуб бош директори Ханс-Йоахим Ватцке.
«Боруссия» жамоа етакчисини анчайин қониқарли молиявий таклиф билан ўзида ушлаб қолишга ҳаракат қилмоқда. Декабрь ойида Bild «Боруссия» унинг маошини икки баравар оширмоқчи (йилига 8 миллион евродан 16 миллион еврогача) экани ҳақида ёзган эди. Аммо Ла Лига ёки Премьер-лигада унга бунданда кўпроқ маош тўланиши тайин. Воқеалар ривожини эса биргаликда кузатамиз.
