Ўзбекистон олимпия терма жамоасига қарши учрашувдан сўнг ўз фикрлари билан ўртоқлашар экан, Сурия олимпия терма жамоаси бош мураббийи Руи Алмейда, салбий натижага қарамай, шогирдлари кучли рақибга қарши ёмон бўлмаган ўйин кўрсата олишганини қайд этиб ўтди.
«Деярли бутун ўйин давомида майдондаги вазиятни назорат қилиб турдик, бироқ сўнгги дақиқаларда рақиб бизни мағлуб этиши учун имкон бердик. Бу нарса, кўп жиҳатдан, ҳимоячиларимизнинг чарчаб қолганликлари сабаб юз берди», - деди сурияликлар устози.
«Биз Ўзбекистондек кучли жамоага қарши алоҳида стратегия билан майдонга тушган эдик. Биз олдимизга қўйилган вазифани сал қолса амалга ошириб бўлгандик, бироқ рақиб ўз имкониятларидан фойдаланиб қолди ва бизни курашдан чиқариб юборди», - дея қўшимча қилди португалиялик мутахассис.
