Афтидан, Жесси Лингард қишки трансфер ойнаси ёпилгунига қадар “Манчестер Юнайтед”ни тарк этмайди. BBC нашри хабарига кўра, манкунианликлар клуби футболчи учун келган учинчи таклифни ҳам рад этган.

Бу сафар “Манчестер Юнайтед” “Ньюкасл”га “йўқ” деди. Премьер-лигада жон сақлаб қолиш учун курашаётган “қарғалар” 29 ёшли ярим ҳимоячини ижарага олмоқчи эди.

Аввалроқ “Манчестер Юнайтед” “Тоттенхэм” ва “Вест Хэм” таклифларидан воз кечганди. Бу клубларга рад этиш сабаби эса, Чемпионлар лигаси зонасидаги ўринлар учун курашда “қизил иблислар”нинг рақиби эканлиги билан изоҳланган.

2021/2022 йилги мавсумда Жесси Лингард 14 та ўйин ўтказди. Яримҳимоячи иккита гол урди ва битта голли узатмани амалга оширди.