Ўзбекистонда Формула-1 пойгалари ўтказилиши мумкин. Бу ҳақда «Kun.Uz» интернет нашри,  «Caterham» Формула-1 жамоасининг малайзиялик хўжайини Тони Фернандесга асосланиб, Формула-1 пойгалари бўйича таниқли журналист Жеймс Аллен ўз блогида берган маълумотига таяниб хабар бермоқда.

2012-йил давомида Осиёнинг бир қатор мамлакатлари – Малайзия, Хитой, Баҳрайн, Сингапур, Япония, Жанубий Корея, Ҳиндистон ҳамда Бирлашган Араб Амирликларида гранд-при мусобақалари ўтказилади. Тони Фернандеснинг сўзларига кўра, Осиёдаги Формула-1 пойгаларига мезбонлик қилувчи мамлакатлар сони бундан ҳам ошиши мумкин.

«Caterham F1» жамоаси раҳбарининг айтишича, Индонезия ёки Филиппин сингари бой мамлакатлари ҳали Формула-1га эътибор қаратишмаган. «Мен «истон»лар» деб атайдиган давлатлар ҳам бор: Қозоғистон, Ўзбекистон ва Шимолий Осиёнинг бошқа мамлакатлари… Шундай экан, Осиёдаги гранд-прилар янада кўпроқ бўлади», – деди Фернандес.

Жеймс Аллен блогидаги ўқувчилардан бирининг ёзишича, «Қозоғистон, Ўзбекистон ёки Туркманистонда Формула-1 мусобақаларини ўтказиш тақдири Абу-Даби, Баҳрайн ёки Хитойдагидан фарқ қилмайди, чунки бу бой мамлакатларда пул бўлгани билан, мусобақага қизиқиш йўқ».

Тони Фернандес – 48 ёшли малайзиялик ишбилармон бўлиб, «AirАsia» авиакомпанияси ва «Tune Group» компаниялар гуруҳи эгаси ҳисобланади. У «Caterham F1» формула бир жамоасидан ташқари, Англия Премер-Лигасида иштирок этувчи «Куинз Парк Рейнжерс» клубининг 66 фоиз аксияси эгаси ҳам ҳисобланади. «Forbes» журнали ҳисоб-китобига кўра, Фернандеснинг бойлиги тахминан 400 миллион доллар атрофида; «ForFourТwо» журнали танловига кўра, энг бой клуб эгалари рўйхатида учинчи ўринни банд этган.

Маълумот ўрнида, Ҳиндистон гранд-приси Формула-1 мавсумига 2011-йилда қўшилган бўлиб, ўша йилнинг октабр ойида мусобақа учун «Будда халқаро автодроми» фойдаланишга топширилган эди. Йўлнинг қурилиши учун, маълумотларга кўра, 10 милиард рупий (215 миллион доллар) маблағ сарфланган.