«Аталанта» бош мураббийи Жан Пьеро Гасперини яримҳимоячи Йосип Иличичнинг психологик муаммолари ҳақида гапирди.
Словениялик футболчи депрессия кучайгани учун 9 январдан бери клубда ўйнамагани ҳақида маълумотлар берилган эди.
«Менга бундай нарсалар ҳақида гапириш ҳар доим қийин, чунки бу жуда шахсий муносабатлар. Фақат шуни айтишим мумкинки, биз Иличич билан доим яқин бўлганмиз, чунки бу футболдан, касбдан ҳам ташқаридаги муносабатларни англатади.
Биз уни кўп йиллардан бери биламиз, кўп бахтли онларни бирга бошдан кечирганмиз. У мен учун ижобий одам.
Умид қиламанки, у тезроқ майдонга қайтади. Бироқ мураббий сифатида айта оламанки, буларнинг барчаси олдиндан айтиб бўлмайдиган ва нозик жараёнлар», - дейди мураббий.