«Барселона» ҳужумчиси Ансу Фати жамоа мухлисларига мурожаат қилди.

«Афсуски, мен футболнинг энг ёмон босқичини бошдан кечирмоқдаман, лекин ҳеч қачон таслим бўлмайман. Қўллаб-қувватлаш ҳақидаги хабарларингиз учун сизга катта раҳмат. Ҳеч қачон таслим бўлманг», деб ёзди Фати твиттерда.

Эслатиб ўтамиз, ҳужумчи «Атлетик» билан ўйиннинг (2:3) 61-дақиқасида захирадан майдонга тушган ва 35 дақиқадан сўнг жароҳати туфайли майдонни тарк этганди. Майдонни тарк этган Фати кўз ёшларини тия олмади.

Маълумотларга кўра, шифокорлар футболчининг жорий мавсумда мушакларида олдинги жароҳатнинг қайталанишини олдини олиш учун жарроҳлик амалиётини ўтказиш тарафдори. Якуний қарор футболчи ва унинг ота-онаси билан учрашувдан сўнг қабул қилинади.

Фати операция қилинган тақдирда, у тахминан уч ойни ўтказиб юбориши мумкин.