"Челси" бош мураббийи Томас Тухель "Тоттенхэм"га қарши (2:0) Англия премьер-лигасининг 23-тур учрашуви вақтида юз берган воқеадан сўнг мухлисларни футболчиларга ҳурмат кўрсатишга чақирди.

Эслатиб ўтамиз, учрашув вақтида "шпорлар" мухлислари "Челси" ҳимоячиси Антонио Рюдигерга турли хил нарсаларни, масалан, зажигалка ва шиша очувчига ўхшаш нарсаларни улоқтиришган. Футболчи ҳакам эътиборини "Тоттенхэм" мухлисларининг хатти-ҳаракатларига қаратишга уринганига қарамай, учрашув тўхтатилмади. Ўйиндан сўнг полиция икки кишини ҳибсга олди.

“Ҳар бир инсон бир-бирини ҳурмат қилиши ва ўзини маълум тамойилларга мувофиқ тутиши керак. Агар бу янги тенденция бўлса, биз уни имкон қадар тезроқ тўхтатиш учун биргаликда ҳаракат қилишимиз керак. Фантастик муҳит ва инглиз футболининг ўзига хос атмосферасини сақлаб қолиш керак", - дея Тухелнинг сўзларини келтиради Sky Sports.