Хабарингиз бор, янги мавсумга тайёргарлик кўраётган "Нефтчи" футбол клуби Туркиянинг Анталья шаҳрида ўқув-машғулотлар йиғинини давом эттирмоқда. Илҳом Мўминжонов бош мураббийлигидаги жамоамиз аъзолари кунига икки маҳалдан шуғулланмоқдалар.

Бугун жамоа мураббийлар штаби футболчиларнинг жисмоний ҳолатини оптимал даражага етказиш мақсадида эрталабки машғулотларини фитнес-клубдаги тренажёр залида олиб боришди ва у ерда олинган жисмоний юкламалардан сўнг машғулотлар Ўртаер денгизи соҳилига кўчирилди.Майин қумликда олиб борилган шуғулланиш жараёни енгил югуриш билан якунланди. Режадан ўрин олган бугунги машғулотларнинг иккинчи қисми кечқурунга мўлжалланган бўлиб, футбол майдонида ўтказилади.