«Милан» бош мураббийи Массимилиано Аллегри «Катания»га қарши Италия чемпионати 30-тур учрашувидан сўнг (1:1), ҳакамлар ишидан норози эканлигини маълум қилди. Гап бунда жамоа ҳужумчиси Робиньонинг ҳисобга олинмаган голи ҳақида бормоқда.
«Бир нарса дейиш қийин, бироқ бу тоза гол эди. Гап бош ҳакам ёки унинг ёрдамчисида ҳам эмас. Муаммо шундаки, «ҳакамлар «Милан» фойдасига ишлайди» деб такрорлашдан чарчамайдиганлар овозларини ўчиришлари керак», деди «Милан» устози.
«Мунтарининг голи билан боғлиқ вазиятдаги хато («Ювентус»га қарши ўйинда) биз учун чемпионат тақдирини ҳал қилиши мумкин. Мен бефойда муҳокамаларни бошлашни истамайман, аммо одамлар барибир яна ва яна ҳакамлик ҳақида гапиришмоқда. Турган гапки, ҳозир ўзим ҳам ҳакамларнинг хатоси ҳақида гапиришга мажбур бўлаяпман», деди Аллегри.
«Биз ҳужумда кўп ҳаракат қилганимиз билан, хавфли вазиятларни кўп ҳам юзага келтира олмадик. Иккинчи бўлимда «Катания» жуда кучли ўйнади, биз эса эрта хотиржамликка берилиб қолдик. Балки, бунга Чемпионлар Лигаси ўйинидан кейинги чарчоқ сабаб бўлгандир. Биз учун энг муҳими ғалаба қозониш эди, бироқ буни уддалаш осон бўлмаслигини ҳам билардик», деди «Милан» бош мураббийи Массимилиано Аллегри.