3 апрель куни соат 14:00да Ўзбекистон футбол федерацияси анжуманлар залида энди собиқ олимпия терма жамоаси бош мураббийи Вадим Абрамов иштирокида матбуот анжумани бўлиб ўтади. Бу ҳақда ЎФФ расмий сайти хабар бермоқда.
Матбуот анжумани давомида Абрамов жамоанинг Вьетнамдаги мусобақа давомида иштироки борасидаги фикрлари билан ўртоқлашади.
Бир неча кун аввал Ўзбекистон олимпия терма жамоаси 2012 йилги Олимпиада ўйинлари йўлланмаси учун курашни тўхтатди. Вьетнамда бўлиб ўтган саралаш плей-офф баҳсларида Вадим Абрамов шогирдлари Сурияни мағлубиятга учратишди (2:1), бироқ Уммонга қарши ҳал қилувчи учрашувда имконият бой берилди (0:2). Натижада, Уммон Сенегалга қарши қитъалаларо плей-офф баҳсида иштирок этиш ҳуқуқини қўлга киритган бўлса, Ўзбекистон терма жамоаси фаолиятини якунлади.
Матбуот анжуманига барча турдаги ОАВ вакиллари таклиф этилади.
