Мадриднинг “Атлетико” клуби ҳужумчиси Луис Суарес агар Уругвай Қатарда бўлиб ўтадиган ЖЧ-2022 йўлланмасини қўлга киритса, Мадрид клуби билан шартномасини яна бир йилга узайтириши мумкин, деб хабар беради "Marca".
Манбага кўра, 35 ёшли уругвайлик футболчининг келажаги борасидаги масала ёзда ҳал бўлади.
Футболчининг ўзи, агар Уругвай терма жамоаси 2022 йилги жаҳон чемпионатига чиқса, чемпионатга яхшироқ формада яқинлашиш учун "Атлетико"да қолишни хоҳлайди.
Мадрид клуби шартномани узайтириш ёки узайтирмаслик масаласини Суареснинг қолган мавсумдаги ўйинидан келиб чиқиб ҳал қилади.
Уругвайлик форвард жорий мавсумда “Атлетико” сафида 29 та ўйинда майдонга тушиб, 9 та гол урди ва 2 та голли узатмани амалга оширди. Унинг Мадрид клуби билан шартномаси 2022 йилнинг 30 июнига қадар амал қилади. Трансфермаркт портали уругвайлик футболчининг нархини 10 миллион еврога баҳоламоқда.
