Madridning “Atletiko” klubi hujumchisi Luis Suares agar Urugvay Qatarda bo‘lib o‘tadigan JCH-2022 yo‘llanmasini qo‘lga kiritsa, Madrid klubi bilan shartnomasini yana bir yilga uzaytirishi mumkin, deb xabar beradi "Marca".
Manbaga ko‘ra, 35 yoshli urugvaylik futbolchining kelajagi borasidagi masala yozda hal bo‘ladi.
Futbolchining o‘zi, agar Urugvay terma jamoasi 2022 yilgi jahon chempionatiga chiqsa, chempionatga yaxshiroq formada yaqinlashish uchun "Atletiko"da qolishni xohlaydi.
Madrid klubi shartnomani uzaytirish yoki uzaytirmaslik masalasini Suaresning qolgan mavsumdagi o‘yinidan kelib chiqib hal qiladi.
Urugvaylik forvard joriy mavsumda “Atletiko” safida 29 ta o‘yinda maydonga tushib, 9 ta gol urdi va 2 ta golli uzatmani amalga oshirdi. Uning Madrid klubi bilan shartnomasi 2022 yilning 30 iyuniga qadar amal qiladi. Transfermarkt portali urugvaylik futbolchining narxini 10 million yevroga baholamoqda.
