Европа чемпионлар Лигасининг чорак финал жавоб учрашувларидан иккитаси якунланди ва дастлабки ярим финалчилар аниқланди.
"Камп Ноу"да "Милан"ни қабул қилган "Барселона" хунукроқ ғалаба эришди. Аввалига 10-дақиқада Мессини миланликлар ҳимочиси Антонини ўз жарима майдони ичида яққол чалгани учун нидерландиялик ҳакам Бёрн Кюперс "нуқта"ни кўрсатган, уни "жабрланувчи"нинг ўзи аниқ амалга оширган бўлса, учрашувнинг биринчи бўлими якунланаётган бир паллада "Милан" дарвозасига яна бир пенальти белгиланди. Тўп бурчакдан ўйинга киритилаётганда Бускетснинг (!) либосидан тортиб қолишгани учун! Кўпчинча бундай вазиятларда бош ҳакам футболчиларни оғзаки огоҳлантириб, бурчак тўпни бошқатдан киритишни буюради. Лекин Кюпрес шу куни тарихга киришни истади, шекилли…
Дарвоқе, Мессининг пенальтидан киритган дублигача — 32-дақиқада Златан Иброҳимовичнинг ажойиб пасини Ночерино голга айлантириб бўлган эди. Бу гол қайсидир маънода "Насаф" дарвозасига "Ар-Райян" томонидан киритилган иккинчи голни эслатиб юборади.
Иккинчи бўлимда Мессининг дарвоза томон берган кучли зарбаси рикошет ҳолатида қулай позиция турган Иньестага келиб тушди. Андрес ўз имкониятини қўлдан чиқармади ва ЕЧЛнинг жорий мавсумидаги иккинчи голини киритди — 3:1. Бу ҳисоб ўйин охиригача ўзгармай қолди.
Финалга мезбонлик қилувчи "Алянц Арена"да эса "Бавария" "Марсель" дарвозасига жавобсиз икки гол йўллади. Ҳар иккала гол муаллифи — Олич. Жамоаларнинг Францияда бўлиб ўтган учрашувида ҳам баварияликлар шу ҳисобда ғолиб чиқшган эди.
Эртага чорак финалнинг яна икки жавоб учрашуви бўлиб ўтади. "Реал" "Сантьяго Бернабеу"да Кипрнинг АПОЭЛЬ жамоасини қабул қилиб, ярим финалда "Бавария"нинг рақиби ким бўлишини узил-кесил ҳал қилса, "Челси" "Бенфика"ни синовдан ўтказади. Бу жуфтик ғолиби "Барселона"га қарши майдонга тушади.
БАРСЕЛОНА (Испания) — МИЛАН (Италия) 3:1 (2:1)
Голлар: Месси (11-пенальтидан, 41-пенальтидан), Иньеста (53) — Ночерино (32)
БАРСЕЛОНА: Вальдес, Дани Алвес, Пике (Адриано, 75), Маскерано, Пуйоль, Бускетс, Хави (Алькантара, 63), Иньеста, Фабрегас (С. Кейта, 78), Куэнка, Месси.
МИЛАН: Аббьяти, Абате, Неста, Мексес, Антонини, Амброзини, Ночерино, К. Боатенг (Пато, 69; Лопес, 83), Зеедорф (Аквилани, 61), Робиньо, Ибрагимович.
Огоҳлантиришлар: Маскерано (66), Куэнка (86) — Ночерино (90). Антонини (10), Неста (40), Зеедорф (41), Робиньо (77), Мексес (90), Лопес (90),
Бош ҳакам: Бёрн Кюперс (Нидерландия)
3 апрель. «Камп Ноу». 94629 томошабин
Дастлабки учрашув: 0:0.
БАВАРИЯ (Германия) — МАРСЕЛЬ (Франция) 2:0 (2:0)
Голлар: Олич (13, 37).
БАВАРИЯ: Нойер, Лам, Ж. Боатенг, Бадштубер, Алаба, Тимошчук, Л. Густаво, Мюллер (Рафинья, 39), Кроос (Праньич, 67), Рибери, Олич (Гомес, 75).
МАРСЕЛЬ: Манданда, Аспиликуэта, Фанни, Нкулу, Морель (Амальфитано, 46), Мбиа, Шейру, Реми (Каборе, 63), Вальбуэна, А. Айю, Брандао (Жиньяк, 74).
Огоҳлантиришлар: Алаба (64) — Мбиа (37)
Бош ҳакам: Свен Моэн (Норвегия)
3 апрель. «Альянц-Арена». 66.000 томошабин.
Дастлабки учрашув: 2:0
