Аёллар футболи бўйича 2021 йилги мамлакат чемпионатининг Олий лига ўйинларига жалб этилган аёл ҳакамларининг жами сони 15 нафарни ташкил этди. Беш нафари бош ҳакам, ўн нафари эса қанот ва захира ҳаками сифатида фаолият юритди.

Энг кўп учрашувни бошқариш Ҳуснора Жумаевага насиб этди – 17 та ўйинда бош ҳакам бўлди. Розиябону Юсупова 15, Эдита Мирабидова 14 та ўйинни бошқарди. Анна Сидоровага 12 та учрашув тақдири ишониб топширилган бўлса, Кристина Борисова 6та ўйинга бош ҳакам этиб тайинланди.

Қанот ва захира ҳаками сифатида энг кўп ишлаган Зилола Раҳматова ва Меҳирабону Муралиева бўлди – 18 тадан. Маржона Раҳматуллаева ва Кристина Середа 17 тадан, Гулшода Саидқулова ва Александра Кончикова 16 тадан ўйинда бош ҳакамга ёрдам беришди. Дарья Снеткова 15 та, Лайло Жалолова 14 та, Манзура Мангетбаева 9 та ҳамда Шахло Абилова 8 та учрашувда қанот ва захира ҳакам сифатида ҳаракат қилишди.   

ФИФАнинг собиқ рефери ассистенти, аёллар ўртасидаги жаҳон ва Осиё чемпионатларида ҳакам сифатида фаолият кўрсатган Ирина Куцилло 2021 йилдан илк бор назоратчи ҳакам сифатида намоён бўлди. Ирина аёллар Олий лигасининг биринчи турида “Бунёдкор-W” – “Қизилқум-W” учрашувида назоратчилик фаолиятини бошлаган бўлса, мавсум якунига қадар яна бешта ўйинда назоратчи сифатида ишлади.